Me har lenge snakka om at det hadde vore kjekt å oppleva eit anna land for ein periode. Jostein jobbar i Nordsjøen og kan eigentleg bu kor som helst i verda. Bodil og Knut Selle jobbar i Sjømannskyrkja i Los Angeles/San Pedro. I vår bestemte me oss for at me ville reisa til Los Angeles til hausten. Eg fekk permisjon frå jobben min frå august 2009 til januar 2010.Billettar med fleksibel returdato vart bestilt, og me begynte å leita på nettet etter plass å bu. Så vart det slik at me fekk løyve til å setja ei campingvogn på parkeringsplassen til kyrkja. Dette syns eg var det beste alternativet, det verka trygt med inngjerda område med port. Martin og Karoline såg lyst på å ha badebassenget rett utanfor campingvogndøra. I tillegg kan dei springa rett gjennom hagen og inn i leligheten til Bodil og Knut.
27. august reiste me til Los Angeles via Amsterdam. Elleve timar i fly gjekk fint. Ungane syntes det var stas med utleverte tepper, puter, høyretelefonar og flymat. Endre og Knut henta oss på flyplassen ca 15.30 lokal tid. Då var klokka 00.30 i Norge. Temperaturen var 36 grader Celsius, då gjorde det godt med eit bad i bassenget då me kom fram til Sjømannskyrkja.
Den første helga me var her borte var me med på laurdagsgraut på kyrkja. I tillegg var det eit par som gifta seg. Søndagen var det familiegudsteneste. Det var kjekt å sjå arbeidet i kyrkja frå første dag. Bodil og Knut har ein travel og interessant jobb!
Ingen kommentarer:
Legg inn en kommentar